Histórico de exposicións	imprimir
Lugrís. Viaxe ao mundo de Ulyses Fyngal

• DATAS: 23 de decembro de 2008 - 22 de febreiro de 2009
• LUGAR: MUSEO MUNICIPAL DE VIGO "QUIÑONES DE LEÓN"
• HORARIOS:
  • Martes-venres, 10.00 - 13.30h  / 17.00 - 20.00h
  • Sábados, 17.00 - 20.00 hs
  • Domingos, 10.00 - 13.30 hs
  • Mércores tamén mediodía, 13.30 - 17.00h

ACTIVIDADES COMPLEMENTARIAS Á EXPOSICIÓN:

Ruta "Tra-los pasos de Urbano Lugrís"
Visitas guiadas pola cidade de Vigo a cargo de monitora especializada polos lugares clave do pintor na cidade con remate na exposición de Castrelos.

• Duración: 3 horas.
• Dende o día 9 de xaneiro todos os venres e sábados do mes.
• Máximo: 25 persoas.
• Visita gratuíta.
• Imprescindible reserva nos teléfonos 986 29 50 70/75.

En colaboración co departamento municipal de Turismo e Comercio.

Visitas guiadas á exposición
Dende o día 13 de xaneiro todos os martes, mércores e xoves ata final da exposición.

• Horario: 10.00 - 11.00 - 12.00 horas.
• Duración: 45 minutos.
• Máximo: 25 persoas.
• Visita gratuíta.

Imprescindible reserva nos teléfonos 986 29 50 70/75.

Ciclo de conferencias "En torno a Urbano Lugrís"
Diversos especialistas abordarán vida e obra de Urbano Lugrís.

• Casa Galega da Cultura.
• Febreiro de 2009. Entrada libre e gratuíta ata completar aforo.

PRESENTACIÓN

Co gallo do centenario do nacemento do pintor Urbano Lugrís en 1908, o museo municipal de Vigo "Quiñones de León", en colaboración co departamento de Historia da Arte da Universidade de Santiago de Compostela, presenta a exposición "Lugrís. Viaxe ao mundo de Ulyses Fyngal" que se desenvolverá ata finais de febreiro de 2009.

A elección da data inaugural non é casual. O día 23 de decembro de 1973 morría en Vigo Urbano Lugrís sen demasiada compaña e apenas recoñecemento público. 25 anos máis tarde, no mesmo día, o Concello de Vigo quere renderlle homenaxe a un dos máis xeniais creadores galegos de todos os tempos; con esta magna exposición que reúne fondos públicos e privados - algúns expostos por primeira vez ao público - procedentes de toda a comunidade galega.

O enfoque da exposición é inusual en tanto non se trata da habitual antolóxica ou dun percorrido lineal pola produción do pintor. O seu punto central é un cadro, "Habitación dun vello mariño", a obra mestra do pintor e xoia da colección do museo municipal. En torno a el xiran todos os demais cadros e obxectos presentados que, dalgún xeito, tratarán de desvelar o profundo misterio que xira en torno a esta habitación baleira, en torno a este retrato sen retratado.

Fondos procedentes de:

• Museo Municipal de Vigo "Quiñones de León"
• Museo de Pontevedra
• Museo de Belas Artes de A Coruña
• Museo Massó
• Colección Caixagalicia
• Colección da Universidade de Santiago de Compostela
• Colección Puertas Mosquera
• Colección Carlos Vilas
• Coleccións particulares

DESCRICIÓN

O 23 de decembro de 1973 falecía Urbano Lugrís, un pintor coruñés que, o mesmo que Ulises - pseudónimo que utilizou frecuentemente- atopou durante algúns anos da súa vida porto e descanso en Vigo.

Foi durante estes anos, nesta Itaca particular, na que Ulyses Fingal-Urbano Lugrís desenvolveu unha das etapas máis interesantes e aleccionadoras da súa vida artística, aquela na que as súas obras se poboan de sereas, barcos afundidos, monstros mariños, fanais, etc.

A obra de Lugrís ten algo de fantástico e enigmático que, dun modo inmediato, cativa ao espectador. Non se trata só de que a súa obra teña unha base figurativa, é algo moito máis profundo e complexo pois constitúe unha apelación directa ao recoñecemento dos obxectos e as relacións emotivas que se poden chegar a trabar entre estes e o espectador.

"Lugrís, viaxe ao mundo de Ulyses Fingal", a exposición que se inaugura o 23 de decembro de 2008 no Museo "Quiñones de León" é, en realidade, un exercicio de reflexión sobre a obra de Lugrís, sobre o valor dos obxectos como portadores de memoria e, en última instancia, sobre a pintura como recurso mnemotécnico presente ao longo da historia.

Cada unha das tres salas preséntanos un destes apartados. Deste xeito en "Modos de ver" móstrase ao espectador a través de obras de diferentes épocas como a pintura intentou recoller todos os aspectos posibles da visión: a mímese realista, a curiosidade e o sorprendente, a relación empática entre o cadro e o espectador ou o retrato de amizade. Obras como os gravados da colección Portas Mosquera, o Gabinete de Curiosidades da Universidade de Santiago de Compostela, ou os óleos do fondo Policarpo Sanz, son exemplos ilustrativos de todo iso.

Para rematar, a obra que permite elaborar este discurso non é outra máis que a "Habitación do vello mariño". A devandita obra, pertencente ao Museo "Quiñones de León", transfórmase dentro desta exposición no centro da mesma e, por extensión, no seu desenlace, posto que se busca que o espectador poida chegar a descubrir como detrás da suma de obxectos dispostos nun aparente caos dentro da estancia, o que se esconde non é, nin máis nin menos, que o retrato dun vello mariño. Do personaxe, no fondo o propio Urbano Lugrís, non se pode contemplar o rostro; con todo podemos recoñecelo perfectamente a través da súa vida, a súa peregrinación e os dilemas aos que se tivo que enfrontar.

É esta, en definitiva, unha exposición que, tomando a Lugrís como centro, invítanos a reflexionar sobre a arte da pintura e a esencia das cousas.