Un dos obxectivos prioritarios do museo é a axeitada conservación do pazo e as súas coleccións. A restauración das bandeiras da Reconquista, a recuperación completa da colección de pintura do Legado Policarps Sanz, ou o tratamento antixilófagos do edificio son algúns dos fitos dos últimos anos.

Na actualidade o museo recolle gran parte dos achados arqueolóxicos do seu ámbito territorial. Ademais as colección de arte e historia crecen paulatinamente grazas ás doazóns ou á recuperación de bens municipais actualmente en desuso.

As actuacións do museo nos últimos anos xeraron traballos de investigación que achegaron nova información sobre os seus obxectos de estudo.

O museo municipal fornece de obras de arte a numerosas exposicións tanto na nosa comunidade como no resto do territorio español. Por outra banda as nosas publicacións intercámbianse con preto de 400 museos de todo o mundo.