Pinacoteca galega contemporánea	imprimir
Os renovadores (Salas 2.1 - 2.2)

Sala 2.1. - Xogos de espazo

Nena na galería. Carmen Rodriguez de Legísima. n.1896 - m.1980. Óleo sobre tela.

A representación do espazo convértese nun dos fundamentos básicos da pintura a partir do impresionista francés Degas. Por iso non é estraño que entre os renovadores atopemos  múltiples variantes: SOUTO reformulouno buscando distintas solucións: simultaneidade de distintos puntos de vista, distorsión espacial, perspectiva aberrante, etc...

Nos bodegóns de MASIDE vemos ben presente a influencia de Cezanne; mentres que COLMEIRO apunta á distorsión propia do expresionismo alemán.

Chama a atención Carmen LEGISIMA, coa súa obra “Nena da galería”, pola orixinalidade do encadre e a superposición de planos que suprime a gradación espacial en profundidade da pintura tradicional.

Sala 2.2. - A pervivencia da imaxe

A  arte do  século XX non só xogou coa forma senón tamén coas imaxes e volveu ás veces  sobre os antigos símbolos. A  utilización de imaxes descontextualizadas é o  mecanismo fundamental da creación surrealista á que recorre constantemente MARIO GRANELL.

Xogando na praia. Mario Fernández Granell. 1973. Acrílico sobre lenzo.

COLMEIRO atopa aquí os seus  referentes nas tres grazas clásicas. En SOUTO aparece o tema do anxo caído que probablemente remita á experiencia da  guerra civil. A máscara boneco, o espantallo, en LAXEIRO, de novo en SOUTO, lévanos á  cuestión da deshumanización do home característica do  século XX.